Samþykktir

SAMÞYKKTIR

FYRIR

BYGGINGAFÉLAG NÁMSMANNA ses.

 

 

 

I. KAFLI

NAFN, TILGANGUR OG STOFNANDI

 

1. gr.

Heiti, heimili, aðalstarfstöð og varnarþing

Stofnunin er sjálfseignarstofnun, samkvæmt lögum nr. 33/1999 um sjálfseignarstofnanir sem stunda atvinnurekstur og er heiti hennar Byggingarfélag námsmanna ses

 

Heimili stofnunarinnar og aðalstarfstöð er í Borgartúni 30, 105 Reykjavík.

 

Varnarþing stofnunarinnar er Reykjavík og skal því reka mál á hendur henni fyrir Héraðsdómi Reykjavíkur.

 

2. gr.

Tilgangur stofnunarinnar

Sjálfseignarstofnun þessi starfar í þágu námsmanna. Er tilgangur stofnunarinnar, að eiga, leigja og annast kaup eða byggingu á húsnæði til útleigu, á hagstæðum kjörum, fyrir námsmenn og er það langtímaverkefni stofnunarinnar, sem og að annast rekstur slíkra fasteigna.

 

3. gr.

Húsnæði, úthlutun og leiga

Stjórn stofnunarinnar skal semja reglur um úthlutun og útleigu húsnæðis í eigu stofnunarinnar. Úthlutunarreglurnar skulu ætíð vera í samræmi við gildandi lög og reglugerðir um félagslegt húsnæði, nú reglugerð nr. 873/2001. Reglurnar skal endurskoða reglulega. Leigufjárhæðir eru ákveðnar af stjórn stofnunarinnar, m.a. í samræmi við reglugerð nr. 873/2001 og samræmdar reglur um leigu sem Íbúðalánasjóður gefur út enda er stofnunin háð eftirliti sjóðsins samkvæmt framangreindri reglugerð.

 

4. gr.

Stofnandi og greiðsla stofnfjár

Stofnandi er Byggingafélag námsmanna sem greiðir allt stofnfé stofnunarinnar.

 

5. gr.

Sérréttindi og arður

Hvorki stofnendur né aðrir njóta sérréttinda í stofnuninni.

 

Verði arður af rekstri sjálfseignarstofnunarinnar skal honum einungis ráðstafað til frekari uppbyggingar í starfsemi stofnunarinnar í samræmi við tilgang hennar, sbr. samþykktir þessar.

 

II. KAFLI

UM STOFNFÉ, HÆKKUN ÞESS O.FL.

 

6. gr.

Stofnfé sjálfseignarstofnunarinnar

Stofnfé stofnunarinnar er allar eignir, fastar sem lausar, að engu undanskildu, sem eru í eigu Byggingarfélags námsmanna, á stofnunardegi sjálfseignarstofnunar þessarar. Jafnframt tekur sjálfseignarstofnun þessi við öllum skuldbindingum Byggingarfélags námsmanna. Gerð er grein fyrir eignum og skuldbindingum sem stofnunin eignast og/eða tekur við samkvæmt framangreindu í ársreikningi Byggingarfélags námsmanna fyrir síðastliðið reikningsár, síðasta fyrirliggjandi ársfjórðungsuppgjöri þegar samþykktir þessar eru lagðar fram sem og í greinargerð endurskoðanda, sbr. 11. gr. laga nr. 33/1999.

 

7. gr.

Hækkun stofnfjár

Stjórn stofnunarinnar getur ákveðið hækkun stofnfjár með færslu úr frjálsum sjóðum stofnunarinnar og óráðstöfuðum hagnaði samkvæmt síðasta endurskoðaða ársreikningi og með arfi, gjöfum og öðrum framlögum, t.d. framlögum nýrra aðildarfélaga sem stofnunin hefur þegið til hækkunar á stofnfé. Ef breytingar á samþykktum þessum reynast nauðsynlegar vegna hækkunar stofnfjár gerir stjórn stofnunarinnar þær.

 

8. gr.

Fjárhagsleg ábyrgð, fjáröflun og ráðstöfun fjármuna

Sjálfseignarstofnun þessi ber ein fjárhagslega ábyrgð á skuldbindingum sínum með eignum sínum.

 

Í samræmi við tilgang stofnunarinnar er stjórn hennar heimilt að afla fjár til verkefna hennar með eftirfarandi hætti:

Með innheimtu gjalda af nemenda – eða stúdentafélögum, nemendum og/eða öðrum sem þjónustu hennar njóta.

Með lántökum, frá Íbúðalánasjóði og fjármálastofnunum, innlendum sem erlendum.

Með fjáröflun á almennum markaði, m.a. með útgáfu skuldabréfa.

Með gjöfum eða arfi sem stofnuninni kunna að berast og með öðrum hætti sem stjórn stofnunarinnar telur henni vera til hagsbóta og tilhlýðilegt vera.

 

Stjórn stofnunarinnar er heimilt að ráðstafa hagnaði sem kann að verða af rekstri til verkefna stofnunarinnar, í samræmi við tilgang hennar, en einnig er stjórn heimilt að leggja fjárhæð til hliðar til að tryggja fjárhagsstöðu hennar.

 

9. gr.

Aðildar – eða þjónustugjöld

Stofnuninni er heimilt að innheimta aðildar– eða þjónustugjöld af félögum, sem fulltrúa eiga á fulltrúaráðsfundum, samkvæmt samþykktum þessum. Aðildar – eða þjónustugjöld skulu ákvörðuð ár hvert og skulu aðildarfélög greiða tiltekna upphæð fyrir hvern nemanda sem heyrir undir félagið síðasta ár þar á undan.

Stjórn stofnunarinnar gerir tillögu um fjárhæð gjaldsins og leggur fyrir fulltrúaráðsfund sem tekur endanlega ákvörðun um fjárhæð þess. Gjalddagi aðildar– eða þjónustugjalds er 31. október ár hvert, vegna haustannar, en 28. febrúar ár hvert, vegna vorannar. Standi aðildarfélag ekki í skilum er heimilt að víkja því úr stofnuninni á fulltrúaráðsfundi. Aðeins félagar í þeim aðildarfélögum sem standa skil á greiðslu aðildar– eða þjónustugjalda til stofnunarinnar koma til greina við úthlutun húsnæðis stofnunarinnar, sama gildir um rétt til fulltrúa á fulltrúaráðsfundum.

 

III. KAFLI

UM AÐILD OG ÚRSÖGN

 

10. gr.

Aðild og aðild að fulltrúaráði

Stúdenta- og nemendafélög eftirtalinna skóla eiga aðild að Byggingafélagi námsmanna: Menntavísindasviðs Háskóla Íslands, Háskólans í Reykjavík, Tækniskólans (Stýrimannaskólans og Vélskólans)  og Listaháskólans. Framangreindir aðilar eiga þar með aðild að stofnun þessari og eiga því rétt til fulltrúa á fulltrúaráðsfundum þessarar sjálfseignarstofnunar, í samræmi við ákvæði samþykktar þessarar.

 

Öll nemenda – eða stúdentafélög í skólum á framhalds– eða háskólastigi geta öðlast aðild að Byggingarfélagi námsmanna. Óski önnur félög en þau sem að framan eru talin eftir aðild að stofnuninni skulu þau sækja um hana til stjórnar stofnunarinnar. Stjórnin leggur umsóknina fyrir á næsta fulltrúaráðsfundi sem upp ber, ásamt umsögn stjórnar um umsóknina og framboðið stofnframlag. Áður en umsókn um aðild er lögð fram skal liggja fyrir að aðalfundur viðkomandi stúdenta- eða nemendafélags hafi samþykkt aðildarumsókn.

 

11. gr.

Stofnfjárframlag vegna aðildar

Til að nýtt félag geti öðlast aðild að stofnuninni þarf það að leggja fram stofnframlag til hækkunar á stofnfé stofnunarinnar. Stofnframlög nýrra félaga geta verið í formi peningagreiðslna, fasteigna, lóðasamninga eða skuldbindinga af öðru tagi sem til fjár má meta. Ekki er heimilt að hækka stofnfé með viðtöku skuldbindinga um að inna af hendi verk eða þjónustu.

12. gr.

Úrsögn

Vilji aðildarfélag segja sig úr stofnuninni er því það heimilt, en við úrsögn á viðkomandi félag engar kröfur eða endurkröfur vegna stofnframlaga eða annars á hendur stofnuninni.

 

IV. KAFLI

UM FULLTRÚARÁÐ

 

13. gr.

Fulltrúaráð

Í fulltrúarráði eiga sæti fulltrúar tilnefndir af aðildarfélögum, eins og samþykktir þessar mæla fyrir um og skulu framangreindir fulltrúar skipaðir til eins árs í senn.

 

Til aðalfulltrúaráðsfunda skal boða fulltrúa frá aðildarfélögum þannig: Stúdentafélag Háskólans í Reykjavík tilnefnir 4 fulltúa, Stúdentafélag Menntavísindasviðs Háskóla Íslands tilnefnir 4 fulltrúa, nemendafélag Tækniskólans tilnefnir 1 fulltrúa og nemendafélög Listaháskóla Íslands tilnefna 1 fulltrúa. Verði verulegar breytingar á fjölda nemenda aðildarfélaga skal ákvæði um fjölda fulltrúa hvers aðildarfélags endurskoðað.

 

Aðildarfélögin skulu tilkynna stjórn stofnunarinnar með skriflegum hætti hverja þau tilnefna sem fulltrúa í fulltrúaráð í samræmi við ákvæði samþykktar þessarar.

 

Tilnefning fulltrúa aðildarfélaga helst óbreytt fram til boðunar næsta aðalfulltrúaráðsfundar.

 

Á fulltrúaráðsfundum hafa allir fulltrúar málfrelsi og tillögurétt.

 

Helsta hlutverk fulltrúaráðs er: Vera tengiliður milli nemenda og stofnunarinnar, hafa eftirlit með rekstri hennar og hvernig stjórn hennar og framkvæmdastjóri ráða málum hennar, þ.m.t. fjármálum, að fjalla um skýrslu stjórnar og ársreikninga stofnunarinnar, að kjósa í stjórn stofnunarinnar og að fjalla um tillögur til breytinga á samþykktum þessum, allt eftir því sem nánar er kveðið á um í samþykktum þessum.

 

14. gr.

Fulltrúaráðsfundir

Aðalfulltrúaráðsfund skal halda einu sinni á ári, fyrir lok júnímánaðar ár hvert, en á dagskrá þess fundar skulu helstu verkefni fulltrúaráðs, samkvæmt samþykktum þessum, vera á dagskrá.

 

Aukafundi fulltrúaráðs má halda ef þörf krefur að mati stjórnar eða ef krafa kemur fram um slíkan fund frá aðildarfélögum, sem áttu 2/3 atkvæðisréttar við samþykkt ársreikninga stofnunarinnar á næstliðnum aðalfulltrúaráðsfundi.

 

15. gr.

Aðalfulltrúaráðsfundur

Áður en aðalfulltrúaráðsfundur er settur skal stjórn stofnunarinnar gefa út kjörbréf til handa fulltrúum þeim sem aðildarfélögin tilnefna og mættir eru. Nöfn og kennitölur fulltrúa skal einnig skrá í fundargerðarbók fulltrúaráðs og gildir sú skrá í u.þ.b. ár eða til næsta aðalfulltrúaráðsfundar.

 

Fyrir aðalfulltrúaráðsfund skal ætíð leggja ársreikninga stofnunarinnar til samþykktar, ásamt athugasemdum endurskoðanda. Einnig skal skýrsla stjórnar um starfsemi stofnunarinnar á síðastliðnu reikningsári lögð fram.

 

Á aðalfulltrúaráðsfundi skal kjósa til stjórnar stofnunarinnar. Ár hvert skal aðalfulltrúaráðsfundur einnig ákveða þóknun til stjórnarmanna vegna komandi starfsárs og skal þóknun formanns stjórnar ætíð vera tvöföld þóknun annarra stjórnarmanna.

 

Á aðalfulltrúaráðsfundi skal fjalla um tillögur til breytinga á samþykktum þessum, í samræmi við ákvæði þeirra.

 

Þá skulu önnur mál, löglega upp borin, rædd og afgreidd, með atkvæðagreiðslu eftir því sem við á.

16. gr.

Boðsgestir á fulltrúaráðsfundum

Stjórn stofnunarinnar er heimilt að bjóða öðrum en þeim sem rétt eiga til setu þar, samkvæmt samþykktum þessum, að sitja fulltrúaráðsfundi og getur ákveðið að þeir hafi þar málfrelsi og tillögurétt.

 

17. gr.

Fundargerðir

Fundargerðarbók skal haldin og í hana skráð það sem gerist á fulltrúaráðsfundi. Fundargerð skal lesin upp í fundarlok og undirrituð af fundarritara og fundarstjóra. Fundargerðarbók fulltrúaráðsfunda skal varðveitt á skrifstofu stofnunarinnar og skal fulltrúum í fulltrúaráði hverju sinni heimill aðgangur að henni þar. Þá skal stjórn stofnunarinnar sjá til þess að ljósrit fundargerðar síðasta fulltrúaráðsfundar verði send stjórnum aðildarfélaga eigi síðar en viku frá fulltrúaráðsfundi.

 

18. gr.

Boðun fulltrúaráðsfunda

Fundarboð til aðalfulltrúaráðsfundar skal stjórn stofnunarinnar senda til allra félaga sem rétt eiga til fulltrúa á fulltrúaráðsfundi. Fundur skal boðaður með eigi minna en 30 almanaksdaga fyrirvara. Fundarboð skal vera skriflegt og sent  með tölvupósti og því skal fylgja dagskrá boðaðs fundar eins og hún liggur þá fyrir.

 

Í fundarboði, samkvæmt framangreindu, skal gerð grein fyrir fjölda fulltrúa hvers aðildarfélags á komandi aðalfulltrúaráðsfundi. Í fundarboði skal koma fram að aðildarfélög skuli tilkynna stjórn stofnunarinnar um nöfn og kennitölur fulltrúa sinna en tilkynning samkvæmt framangreindu skal vera skrifleg og undirrituð af a.m.k. tveimur stjórnarmönnum viðkomandi aðildarfélags. Tilkynningu samkvæmt framangreindu skal afhenda stjórn stofnunarinnar svo fljótt sem verða má en í allra síðasta lagi fyrir setningu aðalfulltrúaráðsfundar. 

 

Stjórn skal boða aukafulltrúaráðsfundi. Skriflegt fundarboð skal sent aðildarfélögum. Heimilt er að boða slíka fundi með tölvupósti og með 15 almanaksdaga fyrirvara.

 

19. gr.

Atkvæðisréttur og kjörbréf

Áður en aðalfulltrúaráðsfundur er settur skal stjórn stofnunarinnar gefa út kjörbréf til tilnefndra fulltrúa aðildarfélaga. Kjörbréf eru bundin við nöfn, kennitölur og persónu þeirra fulltrúa sem aðildarfélögin tilkynna um. Láti aðildarfélag undir höfuð leggjast að tilkynna um fulltrúa sína innan þess frests sem til þess er veittur í fundarboði missir viðkomandi aðildarfélag atkvæðisrétt sinn. Kjörbréf eru einungis afhent viðkomandi fulltrúa sjálfum og á öllum fulltrúaráðsfundum er atkvæðisréttur bundinn við nafn fulltrúa og því að hann greiði sjálfur atkvæði. Mæti fulltrúi ekki til fundar eða greiði hann ekki atkvæði um mál, sem þar er til afgreiðslu, er atkvæðisréttur hans óvirkur. 

 

20. gr.

Atkvæði á fulltrúaráðsfundum

Við kosningu á fulltrúaráðsfundi fara 10 fulltrúar aðildarfélaga með 100% atkvæða þannig að hver fulltrúi fer með 10% atkvæða.

 

Framangreind hlutföll miðast við fjögur aðildarfélög og 10 fulltrúa þeirra. Fjölgi eða fækki félögum, sem rétt eiga til fulltrúa á fulltrúaráðsfundum, skal hlutföllum í innbyrðis vægi atkvæða aðildarfélaga breytt. Breytingar skulu miða að því að öll félög, sem eiga aðild að stofnuninni hafi atkvæðisrétt, en önnur ekki. Breytingar á samþykktum þessum vegna nýrra aðildarfélaga skulu afgreiddar á sama fulltrúaráðsfundi og aðild viðkomandi nemendafélags er afgreidd. Segi nemendafélag sig úr stofnun þessari, á milli fulltrúaráðsfunda, reiknar stjórn út breytt hlutföll varðandi fjölda fulltrúa og boðar aðildarfélög til næsta fulltrúaráðsfundar í samræmi við þann útreikning.

 

Um atkvæðavægi varðandi önnur mál en þau, sem sérstaklega er kveðið á um í samþykktum þessum, gildir að meirihluti greiddra atkvæða ræður lyktum máls.

 

V. KAFLI

STJÓRN STOFNUNARINNAR

 

21. gr.

Stjórn stofnunarinnar

Stjórn Byggingafélags námsmanna ses. skal skipuð fimm mönnum og tveimur til vara. Segi einhver stjórnarmaður af sér eða geti ekki gengt stjórnarstörfum vegna veikinda eða annarra langvarandi forfalla skal varamaður hans taka hans fasta sæti í stjórninni.

 

Stjórnarmenn skulu vera lögráða og fjár síns ráðandi og mega ekki á síðustu þremur árum hafa í tengslum við atvinnurekstur hlotið dóm fyrir refsiverðan verknað samkvæmt almennum hegningarlögum eða lögum um sjálfseignastofnanir sem stunda atvinnurekstur, hlutafélög, einkahlutafélög, samvinnufélög, bókhald, ársreikninga, gjaldþrot eða opinber gjöld. Auk þess skulu stjórnarmenn vera almennt í skilum og mega ekki vera skráðir í vanskilaskrár vegna verulegra vanskila. Formaður stjórnar getur krafið stjórnarmenn og varamenn um gögn er þessi atriði varða og stjórnarmenn geta krafið formann um sömu gögn. Ef upp kemur, varðandi meðlimi stjórnar eða varamenn, að einhver þeirra uppfyllir ekki lengur framangreind skilyrði getur stjórnin með meirihluta greiddra atkvæða vikið viðkomandi úr stjórn.

 

Í stjórn skal skipa þannig: formann stjórnar og fjóra stjórnarmenn skal kjósa á aðalfulltrúaráðsfundi samkvæmt ákvæðum samþykktar þessarar. Þar skal einnig kjósa tvo varamenn.

 

Kjörtími stjórnarmanna er eitt ár í senn en hámarksseta stjórnarmanns er 5 ár í senn.

 

22. gr.

Verkaskipting stjórnar

Formaður stjórnar skal boða stjórnarfund eigi síðar en þremur vikum frá þeim aðalfulltrúaráðsfundi þar sem kjörið var til stjórnar. Á fyrsta fundi stjórnar skal hún skipta með sér verkum. Einfaldur meirihluti ræður kjöri.

 

23. gr.

Stjórnarfundir

Reglulega stjórnarfundi skal að jafnaði halda mánaðarlega enda liggi fyrir mál sem afgreiða þarf. Fund skal og jafnan halda ef einhver stjórnarmanna, eða framkvæmdastjóri, krefst þess.

 

24. gr.

Boðun stjórnarfunda

Formaður stjórnar boðar til stjórnarfundar með minnst tveggja virkra daga fyrirvara. Með fundarboði skal dagskrá fundar fylgja. Formanni er heimilt að fela framkvæmdastjóra stofnunarinnar að annast fundarboðun. Fullnægjandi er að boða stjórnarfundi með rafpósti á skráð netföng stjórnarmanna.

 

25. gr.

Seturéttur annarra á stjórnarfundum

Auk stjórnar- og varamanna hafa framkvæmdastjóri stofnunarinnar, eða staðgengill hans rétt til setu á stjórnarfundum. Framannefndir aðilar hafa þar málfrelsi og tillögurétt, með sama hætti og stjórnarmenn, en hafa ekki atkvæðisrétt. Meirihluti stjórnar getur ákveðið að framkvæmdastjóri eða aðrir starfsmenn stofnunarinnar skuli víkja af fundi í einstökum málum.

 

26. gr.

Fundarstjórn o.fl.

Stjórnarfundum stjórnar fundarstjóri sem kosin skal af stjórn. Einnig skal fundarritari kosin af stjórn sem skal sjá til þess að nákvæm fundargerð sé haldin, m.a. um hverjir séu viðstaddir, um ákvarðanir, bókanir og atkvæðagreiðslur. Fundargerð skal lesin upp í lok fundar og undirrituð af fundarritara og fundarstjóra.

 

27. gr.

Ákvörðunarbærni stjórnar

Stjórn er ákvörðunarbær ef meirihluti stjórnar sækir fund. Niðurstaða mála ræðst af einföldum meirihluta. Falli atkvæði jöfn ræður atkvæði formanns, eða varaformanns ef formaður sækir ekki fund, úrslitum. Mikilsháttar ákvarðanir, svo sem kaup og sala fasteigna, lántökur og gerð samninga um meiriháttar viðskipti, má þó ekki taka án þess að allir stjórnarmenn hafi átt kost á að kynna sér viðkomandi málefni og fjalla um það á stjórnarfundi.

28. gr.

Meginskyldur stjórnar

Stjórn sjálfseignarstofnunarinnar fer með málefni hennar og eru meginskyldustörf stjórnar eftirtalin:

1. Að sjá til að skipulag sjálfseignarstofnunarinnar og starfsemi sé jafnan í réttu og góðu horfi og gæta þess að starfsemi stofnunarinnar sé á hverjum tíma í samræmi við tilgang hennar samkvæmt samþykktum þessum.
2. Að hafa stöðugt og ítarlegt eftirlit með öllum rekstri stofnunarinnar, m.a. að nægilegt eftirlit sé haft með bókhaldi og meðferð fjármuna.
3. Að ráða framkvæmdastjóra stofnunarinnar, einn eða fleiri. Stjórn ákveður laun framkvæmdastjóra og önnur ráðningarkjör og setur framkvæmdastjóra starfslýsingu.
4. Að koma fram fyrir hönd stofnunarinnar fyrir dómstólum og stjórnvöldum.
5. Að ákveða hvort, og þá hverjum, skuli veitt prókúruumboð umfram það sem mælt er fyrir um í samþykktum þessum.
6. Að gera tillögur til breytinga á samþykktum þessum, til meðferðar á fulltrúaráðsfundi.
7. Að semja reglur og/eða breytingatillögur á úthlutunarreglum varðandi útleigu áhúsnæði stofnunarinnar.
8. Að skera úr skriflegum kvörtunum sem henni berast vegna úthlutunarreglna stofnunarinnar og/eða vegna samskipta umsækjenda eða leigutaka við starfslið stofnunarinnar í samræmi við þar að lútandi ákvæði í úthlutunarreglum.

 

29. gr.

Firma stofnunarinnar

Meirihluti stjórnar ritar firma stofnunarinnar.

 

30. gr.

Aðgangur að gögnum

Stjórnarmenn og varamenn skulu hafa aðgang að öllum bókum og skjölum stofnunarinnar.

 

VI. KAFLI

UM FRAMKVÆMDASTJÓRA O.FL.

 

31. gr.

Framkvæmdastjóri

Framkvæmdastjóri hefur með höndum stjórn á daglegum rekstri stofnunarinnar og skal hann í þeim efnum fara eftir þeirri stefnu sem stjórnin ákveður og fara að fyrirmælum hennar. Til daglegs reksturs teljast ekki ráðstafanir sem eru óvenjulegar eða mikilsháttar. Slíkar ráðstafanir getur framkvæmdastjóri aðeins gert samkvæmt sérstakri heimild frá stjórn, nema ekki sé unnt að bíða ákvörðunar hennar án verulegs óhagræðis fyrir starfsemi stofnunarinnar. Í slíkum tilvikum skal stjórn tafarlaust tilkynnt um ráðstöfunina.

 

Framkvæmdastjóra ber að veita stjórn, stjórnarmönnum, varamönnum og endurskoðanda allar upplýsingar sem þeir kunna að óska eftir.

 

32. gr.

Prókúruumboð og áritun reikninga

Framkvæmdastjóri hefur prókúruumboð fyrir stofnunina vegna allrar daglegrar starfsemi hennar. Þegar um er að ræða mikilsháttar útgjöld, t.d. vegna greiðslu byggingarkostnaðar vegna fasteigna stofnunarinnar, skal formaður stjórnar, ásamt framkvæmdastjóra, árita reikning til greiðslu.

 

33. gr.

Meðferð fjármuna og reikningshald

Framkvæmdastjóri annast reikningshald fyrir stofnunina og skal hann sjá um að bókhald sé fært í samræmi við lög og venjur og að meðferð eigna stofnunarinnar sé með tryggilegum hætti.

 

34. gr.

Starfsmenn

Framkvæmdastjóri er yfirmaður allra starfsmanna stofnunarinnar og annast hann ráðningu starfsmanna og ákveður ráðningarkjör þeirra. Framkvæmdastjóra er þó ekki heimilt að auka kostnað vegna starfsmannahalds, með fjölgun starfsmanna, nema stjórn hafi samþykkt áætlun og tillögu framkvæmdastjóra þar um.

 

35. gr.

Innra skipulag stofnunarinnar

Ákveði stjórn að ráða fleiri en einn framkvæmdastjóra ákveður hún verkaskiptingu á milli þeirra.

 

Stjórn stofnunarinnar ákveður skipurit hennar, að fenginni tillögu framkvæmdastjóra, og skal henni fylgja greinargerð um helstu þætti varðandi starfsemi sviða og deilda stofnunarinnar. Framkvæmdastjóri ákveður að öðru leyti hvernig innra skipulagi starfsemi stofnunarinnar er hagað, m.a. verkaskiptingu milli starfsmanna, breytingu á störfum þeirra og starfsviði.

 

VII. KAFLI

UM ÁRSREIKNINGA O.FL.

 

36. gr.

Reikningsár og ársreikningar

Reikningsár stofnunarinnar er almanaksárið. Stjórn og framkvæmdastjóri skulu semja ársreikning fyrir hvert reikningsár. Gerð ársreiknings skal vera lokið eigi síðar en einum mánuði fyrir aðalfulltrúaráðsfund og skal reikningurinn þá afhentur endurskoðanda stofnunarinnar til endurskoðunar.

 

37. gr.

Endurskoðandi

Aðalfulltrúaráðsfundur kýs endurskoðanda eða endurskoðunarfélag fyrir stofnunina og ræður þar einfaldur meirihluti greiddra atkvæða. Kosning endurskoðanda eða endurskoðunarfélags stendur svo lengi sem aðalfulltrúaráðsfundur ákveður ekki annað.

 

38. gr.

Endurskoðun ársreikninga

Endurskoðandi skal kanna bókhaldsgögn stofnunarinnar og aðra þætti er varðar rekstur hennar og stöðu í samræmi við lög og góðar endurskoðunarvenjur. Endurskoðandi skal hafa lokið endurskoðun ársreiknings eigi síðar en tveim vikum fyrir aðalfund og skal hann þá afhenda stjórn endurskoðaðan ársreikning ásamt athugasemdum sínum, ef einhverjar eru. Endurskoðaður ársreikningur, ásamt athugasemdum endurskoðanda, skulu lagðar fyrir aðalfulltrúaráðsfund til samþykktar.

 

39. gr.

Ársreikningaskrá

Eigi síðar en mánuði eftir samþykkt ársreiknings, þó eigi síðar en átta mánuðum eftir lok reikningsárs, skal stjórnin senda ársreikningaskrá ársreikninginn, ásamt skýrslu stjórnar, áritun endurskoðanda og upplýsingum um hvenær ársreikningurinn var samþykktur.

 

VIII. KAFLI

UM BREYTINGAR Á SAMÞYKKTUM

 

40. gr.

Breytingar á samþykktum stofnunarinnar

Heimilt er að breyta samþykktum þessum á aðalfulltrúaráðsfundi. Hafi stjórn gert tillögur til breytinga á samþykktum þessum skal hún senda þær tillögur með fundarboði til aðalfulltrúarráðsfundar. Tillögur til breytinga á samþykktum, frá öðrum, skulu hafa borist stjórn stofnunarinnar minnst 15 dögum fyrir fulltrúaráðsfund og skal stjórnin senda þær til þeirra félaga sem rétt eiga til fulltrúa á fulltrúaráðsfundinum eigi síðar en 7 almanaksdögum fyrir fulltrúaráðsfund. Tillaga um breytingar á samþykktum stofnunarinnar þarf samþykki minnst 2/3 hluta greiddra atkvæða til að breytingar nái fram að ganga.

 

IX. KAFLI

UM SLIT OG SAMEININGU

 

41. gr.

Slit og sameining

Með tillögur um sameiningu við annan lögaðila skal farið með sem breytingar á samþykktum þessum.

 

Kom fram tillaga um slit stofnunarinnar skal greiða um hana atkvæði á aðalfulltrúaráðsfundi en slík tillaga getur ekki talist samþykkt nema því aðeins að a.m.k. 2/3 hlutar fulltrúa aðildarfélaga ljái henni jáyrði sem og a.m.k. 2/3 hlutar stjórnar.

 

Við slit stofnunarinnar skal hreinni eign ráðstafað til þeirra aðildarfélaga, sem aðild áttu að henni við slitin í sama hlutfalli og atkvæðisrétti þeirra var háttað vegna samþykkta ársreikninga á síðasta aðalfulltrúaráðsfundi fyrir slitin. Að öðru leyti skal, verði stofnunin leyst upp eða hún sameinuð öðrum lögaðila, farið eftir ákvæðum XIII. kafla laga nr. 138/1994 um einkahlutafélög, sbr. einnig XIV. kafla sömu laga, eftir því sem við á.

 

X. KAFLI

ALMENN ÁKVÆÐI

 

42. gr.

Almenn ákvæði

Þar sem ákvæði samþykktar þessarar segja ekki til um hvernig með skuli fara skal hlíta ákvæðum laga nr. 33/1999 um sjálfseignastofnanir sem stunda atvinnurekstur, svo og öðrum lagaákvæðum sem við geta átt.

 

Þannig samþykkt á fulltrúaráðsfundi Byggingafélags námsmanna í Reykjavík þann 15 nóvember 2010, með breytingu 20.maí 2015 og 24.maí 2023.